«Міс Беларусь» усё больш нагадвае конкурс прыгажосці ў гарэме

Раней часта казалі, што ўдзельніцы конкурсу «Міс Беларусь» пасля яго трапляюць у світу Лукашэнкі — у так званы «кавуновы батальён». Фактычна прыгажуні — адзін са статутных аксэсуараў састарэлага палітыка.

Яго фразу «жанчыны — наша самая эфектыўная дыпламатычная зброя» нават надрукавалі на мерчы. У цішотках з такім надпісам на грудзях сёлета з'явіліся некаторыя з удзельніц конкурсу прыгажосці.

Маладыя дзяўчыны ствараюць прыгожы фон, калі дыктатар глядзіць нейкі канцэрт ці спрабуе закінуць шайбу ў вароты.

«Наша Ніва» прааналізавала сацыяльныя сеткі прэтэндэнтак на карону ў 2025 годзе, і заўважыла: у некаторых прыгажунь лёс складваецца ў адваротным парадку.

Спачатку яны пачынаюць свяціцца на праўладных мерапрыемствах, а ўжо потым трапляюць у спіс удзельніц «Міс Беларусь».

Дарэчы, такое адбываецца не ўпершыню. Можна згадаць адну з апошніх фаварытак Лукашэнкі Уладлену Зайцаву. Да таго, як трапіць на «Міс Беларусь», а потым стаць яго публічнай кампаньёнкай, яна перыядычна з'яўлялася сярод тых дзяўчат, якія на афіцыйных мерапрыемствах выносяць чыноўнікам кветкі ці каравай.

Цікавы факт: прыгажуням, якія па камандзе пасміхаюцца ды дэфіліруюць на высокіх абцасах, кажуць, што яны не абы-чым займаюцца, а служаць Айчыне.

Дар’я Базылева родам з Гомеля. Дзяўчыну на конкурсе прадстаўлялі як студэнтку, якая вучыцца на псіхолага. Але «выносіць кветачкі» таксама пачала: яе можна пабачыць на фотаздымках, калі чыноўнікі сёлета ў Гомелі ўскладалі кветкі 9 мая.

Аб тым, што Дар’я не проста прыгнаная студэнтка, а штатная прыгажуня, сведчыць агульны здымак: яна пазіруе ў кампаніі іншых дзяўчат, якія апрануліся абсалютна аднолькава і зрабілі ідэнтычныя прычоскі і макіяж.

Пра мінчанку Віталію Жамко распавялі, што яна, з аднаго боку, хоча працаваць у адвакатуры, а з іншага — прадстаўляць Беларусь на міжнародных конкурсах прыгажосці. Сёлета напрыканцы сакавіка Віталія выклала сторыс, як глядзела хакейны матч з удзелам Лукашэнкі.

Мінчанку Крысціну Бельскую прадстаўлялі як настаўніцу англійскай мовы, якая марыць стаць сцюардэсай. Але ж у сваім інстаграме дзяўчына пазіцыянуе сябе як мадэль. Цалкам лагічна, бо дзяўчына актыўна ўдзельнічае ў конкурсах прыгажосці.

Фактычна Крысціна пакуль ідзе шляхам Уладлены Зайцавай. Як і яна, Крысціна з’яўляецца перад вачыма Лукашэнкі падчас «Славянскага базару» ды на свяце ў Александрыі.

Мінчанка Кацярына Трыказа сёлета паспела атрымаць карону «Міс Мінск». Допіс, прысвечаны сваёй перамозе, дзяўчына скончыла праўладным лозунгам: «Час абраў нас».

У тэлеграм-канале Трыказа публікавала здымкі з Савета Рэспублікі: сёлета ў чэрвені Беларусь і Азербайджан падпісалі пагадненні аб супрацоўніцтве паміж моладзевымі арганізацыямі. Кацярына была адной з тых прыгажунь, якія падносяць сур’ёзным дзядзькам дакументы на подпіс.

Ёсць яшчэ адна ўскосная прыкмета, які можа сведчыць пра тое, што дзяўчына ўваходзіць у спіс штатных прыгажунь — гэта чорны чахол на тэлефон з надпісам «Рэспубліка Беларусь», залатым гербам і чырвона-зялёным сцягам.

З такімі раней ужо засвяціліся актыўныя ўдзельніцы лукашэнкаўскіх мерапрыемстваў Дар’я Ганчарэвіч і Яна Бараноўская (яны таксама ў свой час удзельнічалі ў конкурсе «Міс Беларусь»). Дарэчы, такі самы чахол з дзяржаўнай сімволікай мае і Кацярына Трыказа.

Ганна Бычко вучыцца ў медыцынскім ВНУ, плануе стаць дзіцячым хірургам. Сёлета 9 мая яна ўдзельнічала ў лукашэнкаўскім парадзе і, мяркуючы па яе сторыс, сядзела на адной з віп-трыбун.

Стэфанію Казловіч прэзентавалі як пракурорку. На АНТ казалі, што яна хоча змагацца за «абарону правоў і свабод грамадзян, захаванне законнасці». Прыгажуня з'яўляецца актывісткай БРСМ. У яе акаўнце шмат фота і відэа з афіцыйных мерапрыемстваў.

Стэфанія ганарыцца тым, што ёй даручаюць выносіць кветачкі і дыпломы. Сёлета пасля лукашэнкаўскай інаўгурацыі яна здымала відэа, як палітыку прысягаюць на вернасць вайскоўцы на плошчы герба і сцяга.

На парадзе 9 мая Стэфанія таксама была недзе недалёка ад Лукашэнкі.

Яна сфатаграфавалася ў кампаніі іншых прыгажунь, якіх апранулі аднолькава: чорныя касцюмы, белыя блузкі ды бэжавыя трэнчы.

Прычоскі таксама аднолькавыя — традыцыйныя гулькі. Такія самыя можна пабачыць і ў дзяўчат, якія ў палацы Незалежнасці прыносяць каву ды гарбату дарагім гасцям Лукашэнкі.

Пра Лізавету Лукшу падчас конкурсу распавялі, што днём яна можа быць на практыцы ў пракуратуры, а ўвечары ўжо заўзець на хакейным матчы. Дзяўчыну таксама перыядычна задзейнічаюць для «падай-прынясі» на розных мерапрыемствах, а яшчэ пераапранаюць у нацыянальныя строі, каб сустракаць розныя дэлегацыі.

Алія Кароткая ўжо не ўпершыню ўдзельнічала ў «Міс Беларусь» — мінулы раз яна прэтэндавала на карону галоўнай прыгажуні ў 2023 годзе. Цяпер у яе інстаграме можна пабачыць фота і відэа з хакейных матчаў Лукашэнкі.

Дзяўчына пахвалілася, што сёлета яе запрасілі глядзець парад з трыбуны А — дарэчы, там сядзела і імаверная дачка Лукашэнкі Крысціна Моцная разам з маці.

Таксама Алія распавяла ў інстаграме, што сёлета разам з палітыкам саджала дрэвы ў будучым парку Народнага адзінства.