Як у Варшаве і Беластоку святкавалі Дзень Волі

Сёлета Дзень Волі прыпадае на аўторак, 25 сакавіка. Шэраг святочных мерапрыемстваў было вырашана правесці на два дні раней, у нядзелю. 23 сакавіка на святочны марш выйшлі беларусы Варшавы. 

На шэсце выйшлі дзясяткі чалавек з бел-чырвона-белымі сцягамі і плакатамі ў падтрымку палітзняволеных. У прыватнасці, быў заўважаны партрэт Міколы Статкевіча, ад якога ўжо шмат месяцаў няма ніякіх звестак.

Ксёндз Вячаслаў Барок, выступаючы 23 сакавіка перад удзельнікамі ўрачыстага мітынгу ў Варшаве, назваў Дзень Волі «самым галоўным святам Беларусі».

— Яно сапраўды галоўнае для тых, хто разумее каштоўнасьць свабоды. Хто цэніць свабоду і хто любіць свабоду», — адзначыў сьвятар Барок. Паводле яго слоў, у Дзень Волі трэба ўзгадваць «шлях, які прайшоў беларускі народ», — цытуе Барка Радыё Свабода.

Нагадаем, што напярэдадні Следчы камітэт заявіў пра намер вызначаць усіх беларусаў, якія будуць удзельнічаць у публічных святкаваннях Дня абвяшчэння БНР.

З гэтай нагоды намеснік кіраўніцы Аб’яднанага Пераходнага Кабінета Павел Латушка заклікаў беларусаў замежжа прытрымлівацца мераў бяспекі ў часе святочных акцый.

У Беластоку на плошчы Касцюшкі 23 сакавіка адбыўся ўрачысты мітынг і невялікі канцэрт Лявона Вольскага.